Mark 9

1Wasesithi kubo: Ngiqinisile ngithi kini: Bakhona abanye kwabemiyo lapha, abangasoze bezwe ukufa, baze babone umbuso kaNkulunkulu usufikile ngamandla ^a.

Ukukhazimuliswa kukaJesu entabeni

2Emva kwensuku eziyisithupha uJesu wasethatha uPetro loJakobe loJohane, wasebakhuphulela entabeni ende ebehlukanisa bodwa ^b; waseguqulwa isimo phambi kwabo; 3lezembatho zakhe zacwazimula, zaba mhlophe nke njengeliqhwa elikhithikileyo, kakulamcoli welembu emhlabeni ongazenza zibe mhlophe kangako ^c. 4Kwasekubonakala kubo uElija eloMozisi, njalo bekhuluma loJesu. 5UPetro wasephendula wathi kuJesu: Rabi*, kuhle ukuthi sibe lapha ^d; futhi asakhe amadumba amathathu, elinye ngelakho, lelinye ngelikaMozisi, lelinye ngelikaElija. 6Ngoba wayengakwazi angakutsho; ngoba babesesaba kakhulu ^e. 7Kwasekufika iyezi labasibekela; kwaba lelizwi elivela eyezini, lisithi: Lo uyiNdodana yami ethandekayo; zwanini yona. 8Njalo bahle bathalaza, kababe besabona muntu, kodwa uJesu yedwa elabo.

9Kwathi besehla entabeni ^f, wabalaya ukuthi bangatsheli muntu izinto abazibonileyo, ize ivuke kwabafileyo iNdodana yomuntu ^g. 10Njalo bazigcinela lelilizwi, bebuzana ukuthi kutshoni ukuvuka kwabafileyo.

11Basebembuza, besithi: Batsholoni ababhali ukuthi uElija ufanele ukufika kuqala? 12Wasephendula, wathi kubo: UElija ufika kuqala isibili, abuyisele zonke izinto; njalo kubhalwe njani ngeNdodana yomuntu ^h, ukuthi izahlupheka izinto ezinengi njalo idelelwe ⁱ. 13Kodwa ngitsho kini ukuthi uElija laye sewafika, basebesenza kuye konke abakuthandayo, njengokulotshiweyo ngaye.

Ukusiliswa komfana owayelesithuthwane

14Kwathi efika kubafundi, wabona ixuku elikhulu libahanqile ^j, lababhali bephikisana labo ^k. 15Lahle lathi ukumbona ixuku lonke laselimangala, lagijimela kuye lambingelela ^l. 16Wasebabuza ababhali wathi: Liphikisana ngani labo ^m? 17Omunye wexuku wasephendula wathi: Mfundisi, ngilethe kuwe indodana yami, elomoya oyisimungulu; 18kuthi loba ngaphi oyibamba khona, uyidabule; ikhihlize amagwebu, igedle amazinyo ayo, yome qha ⁿ; njalo ngikhulume labafundi bakho ukuthi bawukhuphe, kodwa behluleka. 19Wasemphendula wathi: O sizukulwana esingelakholo, koze kube nini ngilani? Koze kube nini ngilibekezelela? Iletheni kimi. 20Basebeyiletha kuye; kwathi umbona, umoya wahle wayihlukuza; yawela emhlabathini ^o, yazigiqagiqa ikhihliza amagwebu ^p. 21Wasebuza uyise wathi: Kulesikhathi esingakanani, lokhu kwenzeka kiyo? Wasesithi: Kusukela ebuntwaneni. 22Futhi uyiphosele kanengi emlilweni lemanzini, ukuze uyibhubhise; kodwa nxa kukhona ongakwenza, sihawukele, usisize. 23UJesu wasesithi kuye: Nxa usenelisa ukukholwa, zonke izinto ziyenzeka kokholwayo. 24Njalo uyise womntwana wahle wamemeza ngezinyembezi wathi: Ngiyakholwa, Nkosi, siza ukungakholwa kwami ^q. 25Kwathi uJesu esebona ukuthi ixuku ligijima kanyekanye ndawonye, wakhuza umoya ongcolileyo, esithi kuwo: Wena moya oyisimungulu loyisacuthe, mina ngiyakulaya: Phuma kuye, ungabe usangena kuye ^r. 26Usumemezile, wayihlukuza kakhulu, waphuma ^s; yasisiba njengofileyo, kwaze kwathi abanengi bathi isifile. 27Kodwa uJesu wayibamba ngesandla, wayiphakamisa; yasisukuma.

28Wathi esengenile endlini ^t, abafundi bakhe bambuza bebodwa bathi: Kungani thina sehlulekile ukuwukhupha? 29Wasesithi kubo: Loluhlobo lungeke luphume ngalutho, ngaphandle komkhuleko lokuzila ukudla.

UJesu uphinda akhulume ngokuhlupheka kwakhe

30Basebesuka lapho badabula eGalili ^u; wayengathandi ukuthi loba ngubani akwazi, 31ngoba wayefundisa abafundi bakhe, esithi kubo: INdodana yomuntu inikelwa ezandleni zabantu, njalo bazayibulala; kuthi isibulewe, izavuka ngosuku lwesithathu. 32Kodwa kabaqedisisanga lumutsho, basebesesaba ukumbuza ^v.

UJesu ufundisa ngokuthobeka

33Wasefika eKapenawume ^w. Kwathi esendlini wababuza wathi: Beliphikisana ngani ^x endleleni ^y? 34Kodwa bathula; ngoba endleleni babephikisene ngokuthi ngubani omkhulu ^z. 35Wasehlala phansi wabiza abalitshumi lambili, wathi kubo: Uba umuntu ethanda ukuba ngowokuqala, uzakuba ngowokucina kubo bonke ^aa, lesisebenzi sabo bonke ^ab. 36Wasethatha umntwana omncane, wammisa phakathi kwabo ^ac; wamgona, wathi kubo ^ad: 37Loba ngubani owemukela omunye wabantwana abancane abanje ebizweni lami, wemukela mina; njalo loba ngubani owemukela mina, kemukeli mina, kodwa yena ongithumileyo ^ae.

38UJohane wasemphendula, wathi: Mfundisi, sabona omunye ongasilandeliyo ^af ekhupha amadimoni ngebizo lakho; sasesimenqabela, ngoba engasilandeli ^ag. 39Kodwa uJesu wathi: Lingamenqabeli; ngoba kakho owenza umsebenzi wamandla ebizweni lami, njalo olamandla okukhuluma kubi ngami masinyane ^ah; 40ngoba ongamelani lathi, ungowethu ^ai.

41Ngoba loba ngubani ozalinathisa inkezo yamanzi ngebizo lami, ngoba lingabakaKristu, ngiqinisile ngithi kini: Kasoze alahlekelwa ngumvuzo wakhe ^aj.

Izikhubekiso

42Futhi loba ngubani okhubekisa omunye walaba abancinyane abakholwa kimi, kungcono kuye ukuthi ilitshe lokuchola ligaxwe entanyeni yakhe, abesephoselwa olwandle ^ak. 43Njalo uba isandla sakho sikukhubekisa, siqume; kungcono kuwe ukungena ekuphileni uyingini ^al, kulokuthi ulezandla ezimbili usuke uye esihogweni ^am, emlilweni ongacitshekiyo ^an, 44lapho impethu yabo engafi khona, lomlilo ongacitshi khona ^ao. 45Njalo uba unyawo lwakho lukukhubekisa, luqume ^ap; kungcono kuwe ukungena ekuphileni uyisiqhwala, kulokuthi ulenyawo ezimbili uphoselwe esihogweni ^aq, emlilweni ongacitshekiyo ^ar, 46lapho impethu yabo engafi khona, lomlilo ongacitshi khona ^as. 47Njalo uba ilihlo lakho likukhubekisa, likhuphe; kungcono kuwe ukungena embusweni kaNkulunkulu ulelihlo elilodwa ^at, kulokuthi ulamehlo amabili uphoselwe esihogweni somlilo ^au, 48lapho impethu yabo engafi khona, lomlilo ongacitshi khona ^av.

Ngetshwayi

49Ngoba wonke uzatshwaywa ngomlilo ^aw; njalo ^ax wonke umhlatshelo uzatshwaywa ngetshwayi ^ay. 50Itshwayi lihle ^az; kodwa uba itshwayi lingelabutshwayi, lizalivuselela ngani ^{ba , bb}? Banini letshwayi phakathi kwenu ^bc, njalo lihlalisane ^bd ngokuthula ^be.